தோனி

                                                                          

                                                                       

இவ்வாண்டு தொடர்ச்சியாக கல்வி சம்மந்தப்பட்ட படங்கள் வந்து கொண்டே இருக்கின்றன. நண்பன், மெரினா..இப்போது தோனி. பிரகாஷ்ராஜின் டூயட் மூவீஸ் தயாரிப்பு என்பதால் நம்பிக்கை வீண் போகவில்லை. இயக்கமும் அவர்தான். சுப்புவாக நடிக்க என்னை விட்டால் ஆளில்லை என்பதை நிரூபித்து இருக்கிறார் 'தோனி' யின் கேப்டன் பிரகாஷ்ராஜ்.

கிரிக்கெட் கேப்டன் தோனியின் தீவிர ரசிகனாக இருக்கும் கார்த்திக்கிற்கு படிப்பு மட்டும் எட்டாக்கனி. கடைநிலை கவர்மென்ட் ஊழியராக இருக்கும் சுப்பு ஊறுகாய் பாட்டில் விற்பனையை சைடில் செய்தும், கந்து வட்டிக்கு கடன் வாங்கியும் பிள்ளைகளை படிக்க வைக்கிறார். திடீரென ஏற்படும் ஒரு விபத்தால் மகன் முடங்கிப்போகிறான். இதை சுப்பு எப்படி எதிர்கொள்கிறார் என்பதுதான் கதை. 

தோனி ரசிகனாக வரும் ஆகாஷின் நடிப்பு இயல்பு. அவனுடைய கோச்சாக நாசர். வழக்கம்போல் மிளிர்கிறார். நவரச நடிப்பின் மூலம் திரையை ஆக்ரமித்து அட்டகாசம் செய்கிறார் பிரகாஷ்ராஜ். என் மகனுக்கு படிக்க வராது என்று சொல்லி ஏன் அவனை புறம்தள்ளுகிறீர்கள் என்று சீறும் காட்சிகளில்..என்னா நடிப்புய்யா!! "சொல்லுங்க. 17 * 8 எவ்ளோ சொல்லுங்க"  என்று ஆசிரியர்களை உலுக்கும்போது நம்மையும் சேர்த்து உறைய வைக்கிறார் இந்த மனிதர். குறிப்பாக நீயா நானா நிகழ்ச்சியில் கதறி அழும்போது கண்டிப்பாக இவ்வாண்டிற்கான தேசிய விருதை தன் வசப்படுத்தி விடுவார் என்று தெரிகிறது. இந்திய சினிமாவின் மிகச்சிறந்த நடிகர்கள் பட்டியலில் தவிர்க்கவே முடியாத ஆளாக இருக்கப்போவதை மீண்டும் உறுதி செய்துள்ளது பிரகாஷ்ராஜின் நடிப்பு.  

தமிழ், தெலுங்கு என இரு மொழிகளிலும் தோனியை படமாக்கி உள்ளதால் பிரம்மானந்தம் உள்ளிட்ட சில தெலுங்கு நடிகர்களும் திரையில் வருகின்றனர். முக்கிய கேரக்டராக வரும் ஆகாஷ் மற்றும் சிலருக்கு டப்பிங் தந்து இருப்பது படத்தோடு ஒட்டவில்லை. கூட கொஞ்சம் செலவு ஆனாலும் பரவாயில்லை. அந்தந்த மொழி பேசத்தெரிந்த நடிகர்களை(நாயகிகளை விடுங்கள். அது நடக்காத காரியம்)  வைத்தே காட்சிகளை அமைத்தால் என்ன? "ஒரேய்.." என்று உரக்க கத்தும் படங்களுக்கு டப்பிங் வைத்தால் கவலை இல்லை. ஆனால் இது போன்ற நல்ல கதைகளுக்கு இடையூறாக இருக்கிறது இந்த செயற்கையான வாயசைப்பு. 

                                                                         

பிரம்மானந்தம், சாம்ஸ், சிங்கமுத்து ஆகியோர் இருந்தும் நாம் சிரிக்க வாய்ப்பே கிடைக்கவில்லை. கந்து வட்டி கனி பாய் ஆக வரும் முரளி கடைசி சில காட்சிகளில் மட்டும் கொஞ்சம் நெகிழ வைக்கிறார். எந்த கேரக்டரையும் தன் சிறப்பான நடிப்பால் மெருகேற்றும் தலைவாசல் விஜய் இதில்  மருத்துவராக நடித்து இருக்கிறார். எங்க சார் போனீங்க நீங்க எல்லாம்? வீ மிஸ் யூ. 'வாங்கும் பணத்துக்கும்' பாடலில் கருத்து சொல்லிவிட்டு போகிறார் பிரகாஷ்ராஜின் நெருங்கிய 'நண்பேன்டா' பிரபுதேவா. கூல் பெர்பாமன்ஸ். 

இசை இளையராஜா. 'தாவி தாவி போகும்' பாட்டை பாடி மனதை வருடுகிறார். மற்ற பாடல்கள் சுமார். முதல்வரை சந்திக்க பிரகாஷ்ராஜ் போராடும் முக்கியமான காட்சியில் பின்னணி இசை ஈர்ப்பை தரவில்லை. நம்பமுடியவில்லை அது இளையராஜாவின் கைவண்ணமென்று. பிரகாஷ்ராஜின் பிரமாதமான நடிப்பு, நச் என்று இருக்கும் வசனங்கள் மட்டுமே தோனியை அவுட் ஆக்காமல் காப்பாற்றுகின்றன. 50% தெலுங்கு டிராமா பார்த்த  உணர்வு வருமாறு சீன்களை தவிர்த்து இருந்தால் மேன் ஆப் தி சீரிஸ் (சிறந்த சினிமா 2012) விருதை வென்றிருப்பான் இந்த தோனி. கடைசி சீன்..க்ளிஷே!!

சில குறைகள் இருந்தாலும் போர் அடிக்காமல் நகரும் காட்சிகள்(குறிப்பாக இரண்டாம் பாதி), ரசிக்கவும், சிந்திக்கவும் வைக்கும் வசனங்கள் மூலம் தன் அணியை வெற்றிப்பாதைக்கு அழைத்து சென்றுள்ளார் டூயட் மூவிஸ் கேப்டன். அனைவருக்குமான படம். தவற விட வேண்டாம். 

தோனி - பவுண்டரிகளை தாண்டி!!

....................................................................................

'ராஜா'ங்கம்: 

படம் முடிந்து டைட்டில் போடுகையில் மீண்டும் ஒலித்த இப்பாடலை கேட்டுவிட்டே அரங்கை விட்டு வெளியேறினேன். இன்னும் எத்தனை முறை கேட்கப்போகிறேன் என்று தெரியவில்லை. இசைஞானி...நீயே உனக்கு என்றும் நிகரானவன்!! 

.......................................................................................

.............................

My other site:

madrasbhavan.com

...............................

........................................................

சமீபத்தில் எழுதியது:
ஸ்பெஷல் மீல்ஸ்(12/02/12)
........................................................